Бүгүн, 22-апрелде, Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабиров Кыргыз Республикасындагы Палестина мамлекетинин Атайын жана Ыйгарым укуктуу Элчиси Ваиль Ахмед Батрехи менен жолугушту.
Жолугушуунун жүрүшүндө тараптар эки тараптуу соода-экономикалык жана инвестициялык кызматташтыкты өнүктүрүүнүн келечегин талкуулашты. Кыргыз тарап өлкөнүн инвестициялык потенциалы, инвестициялык климатты жакшыртууга багытталган жүргүзүлүп жаткан реформалар, ошондой эле инвесторлорду мамлекеттик колдоонун учурдагы чаралары, анын ичинде салыктык жеңилдиктер, мамлекеттик-жеке өнөктөштүк механизмдери жана долбоорлорду «бирдиктүү терезе» принциби боюнча коштоо тууралуу маалыматтар менен тааныштырды.
«Кыргыз Республикасы жагымдуу жана алдын ала божомолдоого мүмкүн болгон инвестициялык чөйрөнү түзүү боюнча ырааттуу саясат жүргүзүп келет. Биз өз ара пайдалуу кызматташтыкты өнүктүрүүгө кызыкдарбыз жана инвесторлорго укуктук кепилдиктерди, салыктык жеңилдиктерди жана долбоорлорду ишке ашыруунун бардык этаптарында коштоону камтыган колдоо чараларынын комплексин сунуштоого даярбыз»
— Равшанбек Сабиров
Сүйлөшүүлөрдүн алкагында ошондой эле курулуш жана инфраструктура, агроөнөр жай комплекси жана туризм сыяктуу артыкчылыктуу багыттарда биргелешкен долбоорлорду ишке ашыруу мүмкүнчүлүктөрү талкууланды.
Жолугушуунун жыйынтыгында тараптар өнөктөштүк мамилелерди тереңдетүүгө, инвестициялык байланыштарды өнүктүрүүгө жана эки өлкөнүн ишкер чөйрөлөрүнүн ортосундагы практикалык өз ара аракеттенүүнү активдештирүүгө өз ара кызыкдар экендиктерин билдиришти.