Эл аралык кызматташууну өнүктүрүү жана инновацияларды тартуу алкагында Кыргыз Республикасынын Президентине караштуу Инвестициялар боюнча улуттук агенттик ХанаЭнергия менен өз ара түшүнүшүү жөнүндө меморандумга кол койду.
Документке Улуттук агенттиктин башчысы Равшанбек Сабиров жана ХанаЭнергия компаниясынын директору Улугбек Марипов кол коюшту.
Меморандум энергетика секторундагы кызматташууну өнүктүрүүгө багытталган. Анын ичинде чет өлкөлүк инвестицияларды тартуу, инфраструктураны модернизациялоо, ошондой эле кайра жаралуучу энергия булактары жаатындагы биргелешкен долбоорлорду ишке ашыруу каралган.
Тараптар жетишилген макулдашуулар заманбап технологияларды киргизүүгө, энергия натыйжалуулугун жогорулатууга жана Кыргыз Республикасынын экономикасынын туруктуу өнүгүшүнө өбөлгө түзөрүнө ишеним билдиришти.