2026-жылдын 12-ноябрында Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Азатович Сабиров инвестициялык долбоордун ишке ашырылышы менен таанышуу жана анын жүрүшүнө мониторинг жүргүзүү максатында «С.М. ИЛБИРС» ЖЧКсына барды.
«С.М. ИЛБИРС» ЖЧКсы Кыргыз Республикасынын аймагында аскердик жана жарандык багыттагы жеңил брондолгон автомобиль техникасын өндүрүүнү жана чогултууну уюштуруу боюнча инвестициялык долбоорду ишке ашырууда. Долбоорго тартылган инвестициялардын жалпы көлөмү 10 млн АКШ долларын түзөт. Долбоордун алкагында 30 жаңы жумуш ордун түзүү каралган.
Иш сапардын жүрүшүндө долбоордун учурдагы ишке ашырылуу абалы, ишкананын өндүрүштүк кубаттуулугу жана өндүрүштү мындан ары өнүктүрүүнүн келечеги талкууланды.
Улуттук агенттиктин башчысы ата мекендик өнөр жай потенциалын чыңдоого, заманбап технологияларды киргизүүгө, жаңы жумуш орундарын түзүүгө жана Кыргыз Республикасынын өндүрүштүк мүмкүнчүлүктөрүн кеңейтүүгө багытталган мындай инвестициялык долбоорлорду өнүктүрүүнүн маанисин белгиледи.
Ошондой эле Улуттук агенттик өлкөнүн социалдык-экономикалык өнүгүүсү үчүн маанилүү болгон инвестициялык долбоорлорду ишке ашырууга көмөк көрсөтүүнү жана инвесторлорду коштоону улантары белгиленди.