Кыргыз Республикасынын Түштүк Кореянын ишкердикти колдоо боюнча уюмдары менен кызматташуусу эки тараптуу экономикалык байланыштарды чыңдоого жана кореялык компаниялардын Борбор Азия рыногундагы ишмердүүлүгүн кеңейтүүгө кошумча мүмкүнчүлүктөрдү түзүүдө.
Бул тууралуу Түштүк Кореянын алдыңкы ишкердик басылмаларынын бири болгон Herald Economy гезитинин 2026-жылдын 15-октябрындагы макаласында айтылат.
Макалада Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабировдун Түштүк Кореянын чакан бизнести колдоо боюнча SEMAS уюмуна болгон иш сапары тууралуу маалыматтар берилген.
Жолугушуунун жыйынтыгында тараптар кызматташтыкты өнүктүрүүгө багытталган өз ара түшүнүшүү жөнүндө меморандумга кол коюшкан.
Басылмада Түштүк Кореянын чакан жана орто ишканаларынын Борбор Азия рынокторуна чыгуу мүмкүнчүлүктөрү да каралган.
Корея Республикасынын Улуттук ассамблеясынын кезектеги жыйынында Демократиялык партиянын депутаты Ли Он Джу компанияларга чет өлкөлүк рынокторго чыгууда практикалык колдоо көрсөтүүнүн маанилүүлүгүн белгилеген.
Анын айтымында, мындай колдоо потенциалдуу сатып алуучуларды табууга, продукцияны бөлүштүрүү каналдарын өнүктүрүүгө жана экспорттук келишимдерди түзүүгө көмөктөшүүнү камтышы керек.
Кореялык продукцияны илгерилетүү үчүн келечектүү багыттар катары K-Food жана K-Beauty белгиленген.
Депутат Ли Он Джу Кыргызстан менен кызматташууну Түштүк Кореянын Борбор Азиядагы ишкердик байланыштарын кеңейтүүгө багытталган кадамдардын бири катары кароо зарылдыгын белгилеген.
Кыргыз Республикасы үчүн кореялык уюмдар менен өнөктөштүктү өнүктүрүү эл аралык ишкердик байланыштарды чыңдоого, жаңы өнөктөштөрдү табууга жана соода-экономикалык кызматташтыкты кеңейтүүгө шарт түзөт.
Түштүк Кореянын ишкердик басылмасында Кыргыз Республикасынын Президентине караштуу Инвестициялар боюнча улуттук агенттиктин ишмердүүлүгүнүн чагылдырылышы эки тараптын ортосундагы институционалдык байланыштардын өнүгүп жатканын жана Кыргызстан менен Түштүк Кореянын ортосундагы кызматташтык мүмкүнчүлүктөрүнө кызыгуу артып жатканын көрсөтөт.
Булак: Herald Economy, 2026-жылдын 15-октябры. Daum порталындагы түп нуска макала.
— (https://v.daum.net/v/20261015145759523)