Бүгүн, 22-июлда, Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабиров Чүй облусунун Новопокровка айылындагы «Гласс Центр» ЖЧК КӨ БИнин курулуп жаткан заводуна барды. Жумушчу сапар өлкөнүн өнөр жай потенциалын өнүктүрүүгө багытталган инвестициялык долбоорлордун ишке ашырылышына мониторинг жүргүзүүнүн алкагында уюштурулду.
Иш сапардын жүрүшүндө Равшанбек Сабиров айнек пакеттерин жана жарыкты чагылдыруучу айнектерди чыгаруучу заманбап өндүрүш комплексинин курулушунун жүрүшү менен таанышып, инвесторлор жана ишкананын жетекчилиги менен биргеликте объектти пайдаланууга берүү боюнча жүргүзүлүп жаткан даярдык иштеринен кабар алды.
Ишке ашырылган ар бир инвестициялык долбоор Кыргызстандын инвестициялык жагымдуулугунун жана бизнес коомчулугунун өлкөгө болгон ишениминин көрсөткүчү болуп саналат. Биздин негизги милдетибиз инвестицияларды тартуу менен гана чектелбестен, долбоорлорду ийгиликтүү ишке киргизүүгө чейин ар тараптуу коштоп жүрүү болуп эсептелет. Дал ушундай өндүрүштөр өлкөнүн жаңы өнөр жай экономикасынын пайдубалын түптөп, жаңы жумуш орундарын түзүп, инвестициялардын мындан ары да көбүрөөк тартылышына шарт түзөт.
— Равшанбек Сабиров
Долбоор кыргыз-өзбек инвестициялык кызматташтыгынын алкагында ишке ашырылып, мамлекеттин, финансылык институттардын жана жеке сектордун натыйжалуу өнөктөштүгүнүн ийгиликтүү мисалы болуп саналат. Долбоордун жалпы инвестициялык көлөмү 5,5 млн АКШ долларын түзөт. Анын 50,7 пайызы Өзбекстан–Кыргызстан өнүктүрүү фонду тарабынан каржыланса, 49,3 пайызы инвесторлордун өздүк каражаттарынын эсебинен камсыздалган.
Ишкананы пайдаланууга берүү ата мекендик курулуш материалдарын өндүрүүнүн көлөмүн кеңейтүүгө, импортко болгон көз карандылыкты азайтууга, жаңы жумуш орундарын түзүүгө жана Кыргыз Республикасынын инвестициялык жагымдуулугун жогорулатууга өбөлгө түзөт. Мындай долбоорлорду ишке ашыруу өнөр жайды өнүктүрүү жана түз чет өлкөлүк инвестицияларды тартуу боюнча мамлекеттик саясаттын артыкчылыктуу багыттарынын бири болуп саналат.