Душанбе қаласында TAJ-TECH 2026 өтуде. Іс-шараның аясында Шанхай ынтымақтастық ұйымына (ШЫҰ) мүше мемлекеттердің стартаптар форумы және «Цифрлық ынтымақтастық: инвестициялар және технологиялық серіктестік үшін жаңа мүмкіндіктер» атты панельдік сессия өтті.
Қазақстанның атынан іс-шараларға Қазақстан Республикасының Президентіне қарасты Инвестициялар бойынша ұлттық агенттіктің басшысының орынбасары Мээримбек Койчуманов қатысты. Ол технологиялық кәсіпкерлікті дамыту үшін құрылып жатқан шарттар, венчурлық қаржыландыру, инвесторларды цифрлық қосу және ШЫҰ-ға мүше мемлекеттермен ынтымақтастық бағыттары туралы ақпараттармен бөлісті.
Мээримбек Койчуманов атап өткендей, Қазақстанда 2026 жылы «Венчурлық қаржыландыру туралы» заң қабылданып, стартаптарға инвестиция тарту үшін құқықтық негіз құрылды. Заңда компаниядағы болашақ үлеске құқық беру туралы келісім және конвертацияланатын займ сияқты заманауи қаржылық құралдар қарастырылған.
Цифрлық ынтымақтастықтың басым бағыттары ретінде энергетика, су ресурстарын басқару және логистика атап өтілді. Бұл салаларда ресурстарды интеллектуалдық есепке алу, жүктемені болжау және жүк тасымалдарын цифрлық басқару сияқты шешімдерді қолдану ресурстардың ысырап болуын және шығындарды азайтып, оларды пайдаланудың тиімділігін арттыруға және жеткізу уақытын қысқартуға мүмкіндік береді.
Сондай-ақ «Инвестициялар» автоматтандырылған ақпараттық жүйесі өнеркәсіптік пайдалануға дайындалып, өзекті ақпараттармен толықталып жатыр. Жүйе инвестициялық жобалар, тиісті құжаттар және келісім кезеңдері туралы ақпараттарды бір жерге жинақтап, жобаларды жүйелі түрде супервизиялауға және мемлекеттік органдармен өзара әрекеттесуді жақсартуға жағдай жасайды.
Инвестициялар бойынша ұлттық агенттік ШЫҰ-ға мүше мемлекеттермен тәжірибе алмасуды жалғастыруға, сондай-ақ жаңа инвестициялық және технологиялық жобаларды іске асыруға көмек көрсетуге дайын.