Сеул қаласында Қазақстан Республикасының Президентіне қарасты Инвестициялар бойынша ұлттық агенттіктің басшысы Равшанбек Сабиров Оңтүстік Кореяның In3 Capital Group, Dinamics Total Solutions, DQB E-FUEL және HWAYA INC компанияларының өкілдерімен кездесті. Кездесу барысында инвестициялық ынтымақтастықты дамыту және цифрлық инфрақұрылым, жасанды интеллект, жаңартылатын энергия көздері, өнеркәсіп өндірісі, сондай-ақ еркін экономикалық аймақтарды дамыту бағытындағы жобаларды іске асыру перспективалары талқыланды.
Равшанбек Сабиров In3 Capital Group компаниясының Азия бойынша басқарушы директоры Брайан Чонгпен цифрлық инфрақұрылымды, жасанды интеллект технологияларын және жаңартылатын энергия көздерін дамыту бойынша жобаларды іске асыру перспективаларын, оның ішінде Қазақстан Республикасында жасанды интеллект технологиялары үшін деректерді өңдеу орталығын (AI Data Center) құру мәселелерін талқылады.
Dinamics Total Solutions компаниясының негізін қалаушы Квон Хэбономмен цифрлық инфрақұрылым және жасанды интеллект бағыттарындағы жобаларды іске асыру мүмкіндіктеріне тоқталды.
DQB E-FUEL компаниясының негізін қалаушы және бас директоры Сангхун Ли Қазақстан Республикасында отынның тиімділігін арттыруға бағытталған жабдықтар өндіретін зауыт салу жобасын таныстырды. Сондай-ақ технологиялық және өнеркәсіп салаларындағы ынтымақтастықтың бағыттары қаралды.
HWAYA INC корпорациясының президенті Хванг Инмин және бас директоры Чонг Мокпен инвестициялық ынтымақтастықты дамыту, бірлескен жобаларды іске асыру, сондай-ақ Қазақстандағы еркін экономикалық аймақтарды дамыту және басқару мәселелері талқыланды.
Қазақстан инвестицияларды тартуға және жаңа жобаларды іске асыруға қызығушылық танытады. Біз кореялық компаниялармен ынтымақтастыққа ашықпыз және инвесторлар үшін қолайлы жағдайларды жасауға дайынбыз. Айрықша заманауи технологияларды, өнеркәсіпті, цифрлық инфрақұрылымды және еркін экономикалық аймақтарды дамытуға ерекше көңіл бөлеміз.
— Равшанбек Сабиров
Кездесудің нәтижесінде барлық компаниялармен цифрлық технологияларды дамыту, жаңа технологияларды және инвестицияларды тарту, инвестициялық және өндірістік жобаларды іске асыру, сондай-ақ еркін экономикалық аймақтарды дамыту саласындағы ынтымақтастықты қарастыратын тиісті меморандумдарға қол қойылды. Тараптар қол жеткізілген келісімдерді іске асыру бойынша ынтымақтастықты жалғастыруға дайын екендіктерін білдірді.