Бүгүн, 2025-жылдын 28-июлунда Соода-экономикалык жана илимий-техникалык кызматташтык боюнча кыргыз-пакистан өкмөттөр аралык комиссиясынын бешинчи отуруму болуп өттү.

Комиссиянын ишине Кыргыз Республикасынын Президентине караштуу Улуттук инвестициялык агенттиктин директорунун орун басары Дамирбек Бикулов катышты. Ал өз сөзүндө Кыргызстандын инвестициялык потенциалы менен тааныштырып, чет элдик инвестиция үчүн артыкчылыктуу багыттарды – туризм, энергетика, айыл чарба, өнөр жай, транспорт жана логистиканы белгиледи. Мамлекеттик колдоо чараларына жана инвесторлор үчүн жагымдуу шарттарды түзүүгө өзгөчө көңүл бурулду.

Жолугушуунун негизги жыйынтыгы Кыргыз Республикасынын Улуттук инвестициялык агенттиги менен Пакистан Ислам Республикасынын Инвестициялык кеңешинин ортосундагы өз ара түшүнүшүү жөнүндө меморандумга кол коюу болду. Документ эки тараптуу кызматташтыкты өнүктүрүүгө, биргелешкен долбоорлорду ишке ашырууга жана экономиканын артыкчылыктуу тармактарында кызматташууну кеңейтүүгө багытталган.

Жолугушууга катышуу кыргыз-пакистан экономикалык байланыштарын чыңдоодогу маанилүү кадам болуп, өз ара пайдалуу өнөктөштүктүн жаңы перспективаларын ачты.