2025-жылдын 14-августунда Кыргыз Республикасынын Президенти Садыр Жапаров «Кыргыз Республикасындагы инвестициялар жөнүндө» мыйзамга кол койду. Документтин негизги максаты — заманбап, ачык-айкын жана атаандаштыкка жөндөмдүү инвестициялык чөйрөнү түзүү жана бизнес үчүн институционалдык кепилдиктерди күчөтүү.

Кыргыз Республикасынын Президентине караштуу Инвестициялар боюнча улуттук агенттиктин маалыматы боюнча, жаңы мыйзам инвестицияларды тартуу боюнча масштабдуу реформанын бир бөлүгү болуп, жөнгө салуунун алдын ала божомолдонушу, ачыктыгы жана институттардын натыйжалуулугу принциптеринин негизинде иштелип чыккан.

Жаңыланган мыйзам — ишенимдүү, туруктуу жана натыйжалуу инвестициялык чөйрөнү курууга карай чоң кадам. Кыргызстан инвесторлор менен конструктивдүү диалогду өнүктүрүүгө, алардын укуктарын коргоого жана өлкө экономикасынын туруктуу өсүшү үчүн реалдуу мүмкүнчүлүктөрдү түзүүгө багыт алган.

Жаңы «КРдеги инвестициялар жөнүндө» мыйзам Кыргыз Республикасынын ички жана эл аралык инвесторлор үчүн ишенимдүү жана алдын ала божомолдонгон өнөктөш болууга умтулушун, ошондой эле өлкөнүн Борбор Азиядагы өнүгүп жаткан инвестициялык хаб катары позициясын чыңдоого арналган.