Қазақстан Республикасының Президентіне қарасты Инвестициялар бойынша ұлттық агенттіктің басшысының орынбасары Мээримбек Койчуманов Қытай-Гонконг халықаралық сауда-экономикалық ассоциациясының (CHKETIA) вице-президенті Уильям Чан бастаған делегациямен кездесті. Кездесуге Sky Angel Travel (Asia) Limited туристік компаниясының өкілдері де қатысты.
Кездесудің барысында Мээримбек Койчуманов инвестициялық ынтымақтастықтың болашағын атап өтіп, Қазақстанда инвестициялық жобаларды жүзеге асыру мүмкіндіктері туралы ақпараттармен бөлісті. Сондай-ақ тараптар шетелдік инвесторлармен серіктестікті нығайту және елдің экономикасына инвестиция тарту мәселелерін қарастырды.
Тараптар Қазақстан Республикасы мен Гонконг арасындағы ынтымақтастықты кеңейтудің болашағын, оның ішінде туризм, халал тамақ өнеркәсібі және ислам қаржысы салаларын талқылады. Кездесудің қатысушылары бірлескен жобаларды жүзеге асыру және инвестиция тарту мүмкіндіктерін кеңейту бойынша пікір алмасты.
Нәтижесінде тараптар диалогты жалғастыруға, кәсіпкерлік байланыстарды нығайтуға және өзара пайдалы инвестициялық ынтымақтастықты дамытуға қызығушылық танытатындықтарын білдірді.