Seul shahrida O'zbekiston Respublikasi Prezidentiga qarashli Investitsiyalar bo'yicha milliy agentlik rahbari Ravshanbek Sabirov Janubiy Koreyaning In3 Capital Group, Dinamics Total Solutions, DQB E-FUEL va HWAYA INC kompaniyalari vakillari bilan uchrashdi. Uchrashuv davomida investitsion hamkorlikni rivojlantirish va raqamli infratuzilma, sun'iy intellekt, qayta tiklanadigan energiya manbalari, sanoat ishlab chiqarishi, shuningdek, erkin iqtisodiy zonalarni rivojlantirish yo'nalishlaridagi loyihalarni amalga oshirish istiqbollari muhokama qilindi.
Ravshanbek Sabirov In3 Capital Group kompaniyasining Osiyo bo'yicha boshqaruvchi direktori Brian Chong bilan raqamli infratuzilmani, sun'iy intellekt texnologiyalarini va qayta tiklanadigan energiya manbalarini rivojlantirish bo'yicha loyihalarni amalga oshirish istiqbollarini, shuningdek, O'zbekiston Respublikasida sun'iy intellekt texnologiyalari uchun ma'lumotlarni qayta ishlash markazini (AI Data Center) tashkil etish masalalarini muhokama qildi.
Dinamics Total Solutions kompaniyasining asoschisi Kwon Hebon bilan raqamli infratuzilma va sun'iy intellekt yo'nalishlaridagi loyihalarni amalga oshirish imkoniyatlariga to'xtaldi.
DQB E-FUEL kompaniyasining asoschisi va bosh direktori Sanghun Li O'zbekiston Respublikasida yoqilg'i samaradorligini oshirishga qaratilgan uskunalar ishlab chiqaruvchi zavod qurish loyihasini taqdim etdi. Shuningdek, texnologik va sanoat sohalaridagi hamkorlik yo'nalishlari ko'rib chiqildi.
HWAYA INC korporatsiyasining prezidenti Hwang Inmin va bosh direktori Chong Mok bilan investitsion hamkorlikni rivojlantirish, qo'shma loyihalarni amalga oshirish, shuningdek, O'zbekistondagi erkin iqtisodiy zonalarni rivojlantirish va boshqarish masalalari muhokama qilindi.
O'zbekiston investitsiyalarni jalb qilish va yangi loyihalarni amalga oshirishga qiziqadi. Biz janubiy koreyalik kompaniyalar bilan hamkorlik qilishga ochiqmiz va investorlar uchun qulay shartlarni yaratishga tayyormiz. Ayniqsa zamonaviy texnologiyalarni, sanoatni, raqamli infratuzilmani va erkin iqtisodiy zonalarni rivojlantirishga alohida e'tibor qaratamiz.
— Ravshanbek Sabirov
Uchrashuv natijasida barcha kompaniyalar bilan raqamli texnologiyalarni rivojlantirish, yangi texnologiyalar va investitsiyalarni jalb qilish, investitsion va ishlab chiqarish loyihalarini amalga oshirish, shuningdek, erkin iqtisodiy zonalarni rivojlantirish sohasidagi hamkorlikni ko'rib chiqadigan tegishli memorandumlarga imzo chekilgan. Tomonlar erishilgan kelishuvlarni amalga oshirish bo'yicha hamkorlikni davom ettirishga tayyor ekanliklarini bildirdilar.