Транспорттук инфраструктуранын өнүгүүсү: «Келечек» тоннели долбооруна старт берилди

Бүгүн, 2-декабрда Кыргыз Республикасынын Транспорт жана коммуникациялар министрлиги, Кыргыз Республикасынын Президентине караштуу Инвестициялар боюнча улуттук агенттик жана “Тез Жол” ЖЧК башында турган компаниялардын консорциумунун ортосунда Төө-Ашуу ашуусундагы “Келечек”альтернативдик тоннелин куруу боюнча мамлекеттик-жеке өнөктөштүк жөнүндө макулдашууга кол коюлду.

Деңиз деңгээлинен 2200 м бийиктикте жайгашкан, узундугу 11,5 км түзгөн жаңы тоннель жыл бою коопсуз жүрүүнү камсыздайт. Долбоордо эки төлөм алуу пункту, жалпы 31,3 МВт кубатындагы эки кичи ГЭС жана заманбап башкаруу системасы да каралган.

Жалпы инвестиция көлөмү 640 млн АКШ долларын  түзөт жана толугу менен жеке өнөктөш тарабынан каржыланат. Ал эми долбоорду ишке ашыруу жана эксплуатациялоо мөөнөтү 49 жылга белгиленген.

Долбоор 2025-жылдын 16-июлундагы Кыргыз Республикасынын Министрлер Кабинетинин №421 токтому менен бекитилген жана өлкөдөгү эң ири инфраструктуралык долбоорлордун бири болуп, транспорттук туруктуулукту жогорулатат. МЖӨ борбору долбоордун ачык-айкын ишке ашырылышын камсыздайт.