Кыргыз Республикасынын Президентине караштуу Инвестициялар боюнча улуттук агенттиктин башчысы КРСУнун студенттери менен жолугушту
Бүгүн, 24-декабрда, Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабиров Б.Н. Ельцин атындагы Кыргыз-Россия Славян университетинин юридикалык факультетинин студенттери менен жолугушту.
Жолугушуу «Ачык эшиктер күнү» алкагында өткөрүлүп, Кыргыз Республикасынын Президентине караштуу Инвестициялар боюнча улуттук агенттиктин ишмердүүлүгүнүн артыкчылыктуу багыттары, ошондой эле өлкөнүн инвестициялык климатын калыптандырууда мамлекеттик институттардын ролу тууралуу жаштардын маалымдуулугун жогорулатууга багытталды.
Иш-чара ачык диалог форматында өттү. Студенттер мамлекеттик инвестициялык саясатка, инвестициялык долбоорлорду укуктук коштоого, ошондой эле мамлекеттик кызмат жана инвестициялык ишмердүүлүк чөйрөсүндө кесиптик өнүгүү мүмкүнчүлүктөрүнө байланыштуу кызыктырган суроолорун берүүгө мүмкүнчүлүк алышты.
Жолугушуунун жүрүшүндө Равшанбек Сабиров келечектеги адистер үчүн сапаттуу билим алуунун жана кесиптик даярдыктын маанилүүлүгүн белгилеп, жаштар өлкөнүн негизги кадрдык потенциалы экенин баса белгиледи. Улуттук агенттиктин башчысы студенттерди окуу процессине жоопкерчиликтүү мамиле кылууга, билимдерин жана көндүмдөрүн тынымсыз өнүктүрүүгө, ошондой эле коомдук жана кесиптик жашоого активдүү катышууга чакырды.
Мындай жолугушуулар мамлекеттик органдар менен студенттик жаштардын ортосундагы өз ара аракеттенүүнү бекемдөөгө, ошондой эле жаш адистерде Кыргыз Республикасынын социалдык-экономикалык өнүгүүсүнүн стратегиялык милдеттерин түшүнүүнү калыптандырууга өбөлгө түзөт.