Кыргыз Республикасынын Президентине караштуу Инвестициялар боюнча улуттук агенттигинин директору Равшанбек Сабировдун Башкы прокуратуранын өкүлдөрү менен жумушчу жолугушуусу

Кыргыз Республикасынын Президентине караштуу Инвестициялар боюнча улуттук агенттигинин директору Равшанбек Сабиров менен Кыргыз Республикасынын Башкы прокуратурасынын алдындагы Ишкерлердин укуктарын көзөмөлдөө башкармалыгынын башчысы Мирлан Аширбаевдин жолугушуусу болуп өттү.
Жыйындын жүрүшүндө Башкы прокуратуранын өкүлдөрү ишкерлердин жана инвесторлордун укуктарын коргоо боюнча жүргүзүп жаткан иштери, ошондой эле бизнес-процесстерди көзөмөлдөөчү органдардын негизсиз кийлигишүүсүн алдын алуу боюнча чаралар тууралуу маалымат беришти.
Тараптар инвесторлордун укуктарын коргоо боюнча чараларды, бизнестин учурдагы көйгөйлөрүн талкуулап, Улуттук агенттик менен Башкы прокуратуранын кызматташуусунун артыкчылыктуу багыттарын аныкташты. Укуктук кепилдиктерди күчөтүү, бизнес климатты жакшыртуу, инвестиция тартуу үчүн шарттарды түзүүгө өзгөчө көңүл бурулду.
Жолугушуунун жыйынтыгында тараптар Улуттук агенттик менен Башкы прокуратуранын ортосундагы инвесторлор үчүн укуктук кепилдиктерди бекемдөөгө, ишкердикти колдоого, бизнес климатты жакшыртууга багытталган кызматташууну активдештирүү боюнча макулдашышты. Кыргыз Республикасынын инвестициялык жагымдуулугун жогорулатуу боюнча демилгелерди биргелешип ишке ашырууга өзгөчө көңүл бурулат.