Bakıdakı İkinci Azərbaycan investisiya forumunun çərçivəsində türk dövlətlərinin investisiya agentlikləri arasında praktiki əməkdaşlığı inkişaf etdirməyə həsr olunmuş TurkIPAnet şəbəkəsinin ikinci sessiyası keçirildi.
Sessiyada Qırğız Respublikasının Prezidentinə bağlı İnvestisiyalar üzrə Milli Agentliyin rəhbərinin müavini Damirbek Bikulov, həmçinin Azərbaycanın, Qazaxıstanın, Türkiyənin və Özbəkistanın investisiya agentliklərinin rəhbərləri və nümayəndələri iştirak etdilər.
Damirbek Bikulov beynəlxalq investor üçün bu gün beş ölkənin bazarına çıxmağın müxtəlif investisiya sistemləri ilə qarşılıqlı əlaqə tələb etdiyini vurğuladı. Bu baxımdan o, ölkələrin layihələrini birgə irəlilətməyə, məlumat mübadiləsi aparmağa və investorlarla işi daha çox koordinasiya etməyə imkan verəcək ümumi investisiya "boru kəməri" (pipeline) yaratmağı təklif etdi.
İştirakçılar keçən il Daşkənd şəhərində beş ölkənin investisiya agentliklərinin əməkdaşlığını gücləndirmək məqsədilə yaradılmış TurkIPAnet şəbəkəsinin bundan sonrakı fəaliyyətini müzakirə etdilər. Əsas diqqət təcrübə mübadiləsindən praktiki əməkdaşlıq mexanizmlərinə keçməyə, o cümlədən investisiya layihələri haqqında məlumat mübadiləsi aparmağa, investorları cəlb etməyə, sərhədarası təşəbbüsləri inkişaf etdirməyə və dəyər yaratma zəncirlərini formalaşdırmağa yönəldildi.
Ölkələrin təqdimatları çərçivəsində qarşılıqlı investisiyaların inkişafı, beynəlxalq bazarlarda investisiya imkanlarının irəlilədilməsi, sərhədarası layihələrin həyata keçirilməsi və potensial investorlarla qarşılıqlı əlaqə məsələləri müzakirə olundu. Sessiyanın nəticəsində iştirakçılar prioritet istiqamətləri müəyyənləşdirərək, TurkIPAnet çərçivəsində konkret birgə fəaliyyətlərə keçməyin zəruriliyini vurğuladılar.