Xitoyning Syamyn shahrida o'tkazilayotgan 26-Xitoy xalqaro investitsiyalar va savdo yarmarkasi (CIFIT) doirasida O'zbekiston Respublikasi Prezidentiga qarashli Investitsiyalar bo'yicha milliy agentlik rahbarining o'rinbosari Meirimbek Koychumanov Xitoyning yirik kompaniyalari va moliya institutlari rahbarlari, shuningdek, chet el davlat va investitsiya tuzilmalarining vakillari bilan bir qator uchrashuvlar o'tkazdi.
Muhim uchrashuvlardan biri Xitoyning Eksport-import banki prezidenti Van Chun'in bilan o'tdi. Tomonlar O'zbekistondagi investitsiya va infratuzilma loyihalarini moliyalashtirish va qo'llab-quvvatlash imkoniyatlarini muhokama qildilar. Shuningdek, Chengtun Mining kompaniyasi rahbariyati bilan uchrashuvda kompaniyaning investitsiya tashabbuslarini O'zbekistonda amalga oshirish imkoniyatlari ko'rib chiqildi.
Bundan tashqari, Meirimbek Koychumanov China Investment Corporation (CIC), Sinosure, Chinalco, Xiamen IPORT Group, Hithium, CATL, C&D, China Energy Engineering Group (CEEC), CSCEC va boshqa yirik kompaniyalar vakillari bilan suhbatlashdi. Chet el hamkorlariga O'zbekistonning energetika, sanoat, konchilik sohalari, infratuzilma, logistika va zamonaviy texnologiyalar sohasidagi investitsiya loyihalari tanishtirildi.
G2G formatida CIFITga qatnashgan Finlyandiya, Eron, Saudiya Arabistoni va boshqa davlatlar vakillari bilan ham uchrashuvlar o'tkazildi. Unda davlatlararo aloqalarni rivojlantirish, investitsiya jalb qilish bo'yicha tajriba almashish va qo'shma loyihalarni amalga oshirish imkoniyatlari muhokama qilindi.
O'zbekistonning CIFIT-2026ga qatnashishi xalqaro investitsiya hamkorligini kengaytirishga, yangi hamkorlarni jalb qilishga va aniq loyihalarni ilgari surishga zamin yaratmoqda.