Bugun, 10-sentabrda, O'zbekiston Respublikasi Prezidenti huzuridagi Investitsiyalar bo'yicha milliy agentlik va «Tekstil Trans» MChJ «Sari-Tosh» xalqaro transport-logistika markazini tashkil etish bo'yicha o'zaro tushunish va hamkorlik to'g'risidagi memorandumga imzo chekdilar.
Loyihaga 100 mln AQSh dollari miqdorida investitsiya jalb etish rejalashtirilmoqda. Markaz Xitoy - O'zbekiston - Afg'oniston yo'nalishidagi xalqaro transport qatnovi doirasida, kelajakda Pokistonga chiqish imkoniyati bilan tashkil etiladi.
Loyihada yuklarni saqlash, yig'ish va qayta yuklash, taroziga tortish, bojxona-brokerlik xizmatlari ko'rsatish, shuningdek, raqamli nazorat o'tkazish uchun zamonaviy infratuzilmani tashkil etish ko'zda tutilgan.
O'zbekiston uchun bu faqat yangi logistika ob'ektini tashkil etish emas. Biz mamlakatning Xitoy, Markaziy va Janubiy Osiyo o'rtasidagi muhim transport va savdo tuguni sifatidagi rolini kuchaytirish uchun katta imkoniyat ko'rmoqdamiz. “Sari-Tosh” loyihasi tranzit, savdo va ishlab chiqarishning rivojlanishiga, shuningdek, yangi ish o'rinlarini yaratishga ko'mak berishi kerak.
— Milliy agentlik rahbari Ravshanbek Sabirov
Memorandum transport-bojxona logistika va tekstil klasterini rivojlantirish yo'nalishidagi loyihani tayyorlash va amalga oshirish bo'yicha tomonlarning uzoq muddatli hamkorligini ko'zda tutadi.
Loyihani amalga oshirish O'zbekistonning tranzit potensialini oshirishga va biznes bilan xalqaro savdo uchun yangi imkoniyatlar yaratishga qaratilgan.